ەلگە ەل قوسىلسا قۇت. ايتپەسە, كەنتتىڭ تىرشىلىگى وسىدان ءبىراز بۇرىن جۇدەۋ ەدى. كەزىندە الىپ ستانسامەن بىرگە سالىنعان كوپ قاباتتى ۇيلەرى بوس قالعان-دى. قازىر جۇدەۋ تىرشىلىككە رەڭ بەرىپ, ءوندىرىستى كەنتتىڭ كەلبەتى وزگەرە باستادى. تۇرعىندارىنىڭ دەنى ەلەكتر ستانساسىندا ەڭبەك ەتۋدە. بۇدان باسقا, بىرنەشە شارۋا قوجالىعى, شاعىن جانە ورتا بيزنەس نىساندارى بار
كەنت اكىمى مارجان الشىنباەۆانىڭ ايتۋىنشا, كەنتتىڭ بىلتىردان بەرى جەكە بيۋدجەتى بار. ياعني, 4-ءشى دەڭگەيلى بيۋدجەت ارقىلى سالىقتان تۇسكەن قارجىعا كەنت قاۋىمداستىعىمەن اقىلداسا وتىرىپ, ىشكى جولداردى, كورىكتەندىرۋ, سايابقتار وتىرعىزۋ قولعا الىنۋدا. تۇرعىندار كەنتكە كىرەبەرىس جولدىڭ جوندەلۋىن كۇتۋدە. جوبا-جوسپارلار دا جەتەرلىك.
بىلتىر گرەس-2 ستانساسى كەنتتىڭ 60 جىلدىق تۋعان كۇنىنە بالالار الاڭىن ورناتىپ جاقسى سىيلىق جاساپ بەرىپتى. تۇرعىن ۇيلەر دە قالپىنا كەلتىرىلۋدە. بوس قالعان پاتەرلەردىڭ 45 وتباسى ەندى كىلتتەرىن الادى. پاتەرلەر قازىر ەكىباستۇز قالاسىنىڭ مەنشىگىنە وتكەن. ەگەر دە قالعان ۇيلەر جوندەلسە , بۇل ۇيدەگى پاتەرلەرگە 200-دەي ادام قونىستانباق.
جالپى, كەنتتە نەگىزىن ءوز ۇلتىمىز قۇرايتىن, ال, قالعاندارى 1880 ورىس, 141 ۋكراين, 82 نەمىس, 79 تاتار, 41 بەلارۋس, 5 شەشەن حالقىنىڭ وكىلدەرى تۇرادى. وزبەكستاننان ەلگە ورالعان 24 وتباسى قونىستاندى. كوش تە جالعاسۋدا.
مىسالى, 3 بالاسى بار اسقاربەك مۇحامەدوۆ تۇركىستان وبلىسى, ارىس قالاسىنان «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى بويىنشا كوشىپ كەلىپتى. ىزدەگەنگە سۇراعان دەپ, ستانساعا گاز-ەلەكترمەن دانەكەرلەۋشى بولىپ جۇمىسقا دا تۇردى.
كەنتتە «التىن ادام», «بارىس», «جوڭعار مەن قازاقتىڭ جەكپە-جەگى», «قاراكەرەي قابانباي», «شاپىراشتى ناۋرىزبايدى» مۇسىندەگەن ءمۇسىنشى, سۋرەتشى, قولونەرشى, ەركىنجاس اعا مۇحامەدجانوۆپەن جولساپار بارىسىندا تانىسقانبىز. مەكتەپ وقۋشىلارى, اۋىل بالالارى سۋرەت ونەرىنە بەيىمدەلىپ, مۇسىندەر جاساۋدى ۇيرەنۋدە. ەركىنجاس اعامىز دا, شەتتەن كوشىپ كەلگەن اعايىننىڭ ءبىرى.
بۇل كۇندەرى قازاق تىلىندە ءبىلىم بەرەتىن مەكتەپتە 400 دەي وقۋشى, ورىس تىلىندەگى مەكتەپتە 366 وقۋشى بار. ورىس مەكتەبىندە 130-داي قازاق بالاسى وقىپ جۇرسە, 1-5 جاستىڭ ارالىعىندا 400-دەي كىشكەنتاي ءوسىپ كەلەدى.
ال, تۇرعىندار جاڭا مەكتەپتىڭ اشىلۋىن اسىعا كۇتىپ ءجۇردى. وتكەن جىلى ەكىباستۇز قالالىق قۇرىلىس ءبولىمى كەنتتە سالىناتىن مەكتەپتىڭ بۇكىل ەسەپ-سىزبا قۇجاتتارىن دايىندايدى.
جاقسى جاڭالىقتى جىلدار ويى كۇتىپ جۇرگەن تۇرعىندار كەنتتىڭ ۇلكەن-كىشىسى بار ناۋرىز مەيرامى كۇنى مەكتەپ سالىناتىن قۇرىلىس الاڭىنا جينالادى. كەنتتەگى اباي اتىنداعى جالپى ءبىلىم بەرەتىن مەكتەپ ديرەكتورى ايمان كەنجەباەۆانىڭ ايتۋىنشا, تۇرعىندار سۇيىنشىلەپ, ءبىر-ءبىرىن قۇتتىقتادى. كەنتتىڭ ۇلكەندەرى انۋربەك, قالياسقار قاجى اتالار, كلارا, ءزارۋ, بيعايشا اپالار «مەكتەپتىڭ ىرگەتاسى بەرىك, شاڭىراعى بيىك!» بولسىن دەپ باتا جاسادى. شاشۋ شاشىلدى. وقۋشىلار مەكتەپكە كەلەر جولعا اعاشتار ەگىلدى. انۋاربەك اتانىڭ 10 بالاسى كەنتتەگى بالاباقشا عيماراتىنا ورنالاسقان مەكتەپتەن ءبىلىم الىپتى. ەندى نەمەرەلەرىم جاڭا مەكتەپتە وقيدى دەپ قۋانىشتى.
ال, قازىر مەكتەپ قۇرىلىسى قارقىندى. بيىلعى جىلدىڭ مامىر ايىندا باستالعان قۇرىلىستى جەرگىلىكتى ءوزىمىزدىڭ «ستالمونتاج» جشس مەردىگەر كومپانياسى قولعا الىپتى. بۇيىرسا, جوبا بويىنشا مەكتەپ 2019 جىلدىڭ شىلدە ايىندا دايىن بولماق.
ءسويتىپ, كەلەسى جاڭا وقۋ جىلىن سولنەچنىي كەنتىنىڭ 400-دەن استام وقۋشىسى جاڭا مەكتەپتە وقيدى. سپورت ستاديونى سالىنادى. مەكتەپتىڭ قۇرىلىسىنا 1,2 ملرد. تەڭگە بولىنگەن. ايمان كەنجەباەۆانىڭ ايتۋىنشا, الداعى ۋاقىتتا كەنتتىڭ جالپى ءبىلىم بەرۋ مەكتەبىنەن كوپ سالالى مەكتەپ-گيمنازيا ساناتىنا اۋىستىرۋدا جوسپار دا بار
مەكتەپ قۇرىلىسىمەن ەكىباستۇزعا جاڭادان اكىم بولىپ تاعايىندالعان نۇرجان اشىمبەتوۆ تە تانىسىپ قايتتى. كاسىپورىننىڭ اتقارۋشى ديرەكتورى ۆياچەسلاۆ ۆدوۆىدچەنكونىڭ مالىمەتىنشە, قازىر مەكتەپتىڭ 1-ءشى قاباتى دايىن. ەكىنشى قاباتتا تەرەزەلەردى ورناتۋ, سانتەحنيكالىق جانە ەلەكترمونتاجداۋ جۇمىستارى جۇرگىزىلۋدە. قۇرىلىس ماتەريالدارىنىڭ بارلىعى ەكىباستۇزدىق كاسىپكەرلەردەن جەتكىزىلۋدە. قۇرىلىس باسىندا ماماندارمەن بىرگە جەرگىلىكتى تۇرعىندار دا ەڭبەك ەتۋدە.
فاريدا بىقاي,
«ەگەمەن قازاقستان»
ەكىباستۇز قالاسى,
سولنەچنىي كەنتى
سۋرەتتى تۇسىرگەن: ابزال قابدىراش
